行程: 維爾紐斯古城
住宿: Mabre Residence Hotel
黎到最後一站既國家，帶住興奮既心情，因為立陶宛係今次行程中期望最大既地方，除左琴日既十字架山，Vilnius既舊城同Trakai城堡都係決定今個trip要黎Baltic states既主因。
因為今日既天氣預測話會落雨，所以我地決定明天先去Trakai，今日就留係Vilnius 欣賞下巴洛克式既建築!
今早我地11點幾先起身，行出酒店不遠處就係聖安娜教堂(Sv Onos Baznycia)，聖安娜教堂係1462年時已經開始建造，係明顯充滿哥德式色彩既建築!但係17及18世紀維修時，又加入左文藝復興及巴洛克式既元素落去! 係15世紀時，拿破崙看到它，還說過要把它放在手掌心帶回巴黎!
我地走過小巷進入皮利斯街後，就隨意搵左一間餐廳坐下享受我地豐富既早餐!
呢份早餐不得不提既係potato pancakes，um...一個好難整得難食既食物，佢可以做到!! 係無味，仲要好奇怪既口感... 其餘既都好好味，再配返杯咖啡，絕對係一個80分既好開始!
食完早餐，我地前往維爾紐斯大教堂，維爾紐斯大教堂是立陶宛既主教座堂，也可以說是立陶宛國家的象徵。
不過第一眼睇到既感覺係覺得「點解同想像中既唔同既？唔係純白色架咩？」眼前睇到既教堂係偏向灰黃色既，不過都無影響我地既興致，係附近影多幾張相片又再繼續向前行。
因為整個古城都係巴洛克式建築，望多兩望開始有點兒悶，加上又撞正星期日，街上好多店舖好早就關門，其間我地行左好多專賣琥珀既店鋪，發現原來呢邊既琥珀同塔林、俄羅斯既不同。原來琥珀有四隻色（黃、褐、紅褐及乳黃色紋路），分別代表形成既年度，通常包含住完整昆蟲既琥珀係最貴既！而上次係塔林睇到同買個d，大部份都係褐色為主，今次係維爾紐斯睇到既係多用兩三種不同顏色配搭而成既飾物。本來我睇中左一條手鏈，但因手鏈太大所以無買到，V小姐就再買多左兩條頸鏈。（其實購物真係女生既愛好，購物無國界）！
再沿路行就到黎明之門喇！黎到黎明之門更係要去睇黑臉聖母！上到去見到信徒好誠心又跪又拜！不過我較感興趣係聖母點解會黑臉？！立即就去google一下！發現網上流傳兩個版本：第一個係相傳西班牙神父為左拉近基督教與印第安人既距離而刻意將聖母膚色改成黑褐色；而第二個版本係相傳聖母本位於法國蒙瑟瑞特聖母院，因拿破崙入侵而燒左聖母院，聖母雖相安無事，但卻被薰黑。
由於星期日街道上比較靜，最後返返去皮利斯街食晚餐。我地order左碟A little bit of everything，諗住咩都試下，點知就中伏喇！因為真係唔好食，忍唔住同V小姐講「傳統既野我地真係識條鐵呀！」
沒有留言:
張貼留言