民族身分認同 - 十字架山 Day 7

日期：2015年7月25日
行程：里加-->十字架山-->維爾紐斯
住宿：Mabre Residence Hotel
交通：allego mini bus

今朝好早起身去到Riga Coach Station, 入到去好易搵，好快就搵到前往十字架山既minibus，但當我地擺好行李後上車發現只剩下一個座位，我地開初以為自己上錯車，但有位澳洲伯伯同我地講係呢架車無錯架！就係我地唔知點算個時，仲有兩個韓國人要上車，但車上已經無位！司機打返公司後得到既消息係，本身有兩班車係去Siauliai ，但司機病左，所以只得一部車！後尾司機打返公司安排比我地搭的士直接前去Siauliai! 結果一行五人，包括兩名韓國人、澳洲伯伯同我地就轉搭的士！

係車上同佢地傾下計好快就到左Siauliai 巴士站，入到時巴士站，我地先去搵行李寄放處，確定關門時間後，就去買定今晚前去維爾紐斯既車票，因為事前係網上係無得訂既，所以要即日買定先！

準備好晒後，我地係附近shopping mall食返個快餐就出發去十字架山，我地好豪噤搭的士去，司機就直接要我地包車，佢車我地來回，係個邊等我地，但收左我地60euro! 好貴呀！！

「十字架山位於修雷北方12公里外，1831年11月一場俄國革命後，有人開始於當地插上十字架以悼念一些找不到屍首的烈士門；1953年，史達林去世，歷劫餘生的立陶宛人又陸續於山丘上插上十字架，以悼念那些無法回鄉的親人。1960年代，蘇維埃政府不斷試圖消滅話股風潮，夷平這座山丘，但十字架拔掉後又被重新插上，前仆後繼。

十字架山最動人的地方是體現出立陶宛人以和平，忍耐的方式默默卻堅決地表達他們對國家，身分認同，傳統和宗教信仰的堅持。」

一去到十字架山，見到一大片草原同大大小小既十字架就好興奮啦！一路行過去見再有幾pairs 夫婦係到影結婚相，好多旅客買左不同既十字架，祈禱後放入十未架堆中。

站於十字架山內，會感受到强烈的民族信仰及身份認同感，可能因為噤，好多立陶宛人會選擇係到影結婚相？！

係呢刻又再一次感受到世界好大，有好多不同故事歷史吸引著我去細味品嚐！呢個十字架山雖然面積不大，但卻不會令人失望。

係猛烈既陽光下兩個半小時，我已經晒黑左幾倍，塗再多既防曬只可防曬傷而已！我地決定返去修雷，睇下可唔可以改車票搭4：15pm 個班啦！返到去，原來係唔比改時間，我地就去illy 到食tea，等到6pm，就去拎行李準備上車去維爾紐斯！

去到維爾紐斯已經10pm，我地轉搭的士前去酒店，酒店好靚，服務員非常有善，但唯一美中不足係無電梯，不過服務員會幫我地拎上去。係酒店餐廳食埋晚餐就沖涼休息喇！

東歐的巴黎--里加Riga Day 6

日期：2015年7月24日
行程：塔林--> 里加
酒店：Garden Palace Hotel
交通：Lux Express

一早book 定8:30am既 Lux express lounge 前去Riga! 8:20am 到達Tallinn Coach Station 上車，發現原來lounge 既座位係好舒服的！本身個人認為北歐過境巴士大多數都係舒服既，只係無諗過lounge 更舒服，巴士上有廁所，有咖啡同茶供應，可差電有wifi，而且座位更闊，可以係車上補眠！

坐左5個鐘頭車終於都到達里加了，架車駛入拉脫維亞自由廣場時，會見到聳立於廣場正中央的自由紀念碑，就知道已經到達里加了。係Riga Coach Station 落車後，我地係附近轉乘的士到Garden Palace Hotel，因酒店較近市政廳廣場，minimum 要比7 euro車資！

「里加位於東西歐交會的波羅的海岸邊，自從1201年亞伯特主教建立了里加城後，里加係音樂、藝術、文學、建築的發展，一直都是跟隨西歐的文化脈絡前進。特別是建築方面，不只舊城區保留完整的中世紀建築，從哥德、文藝復興到巴洛克都可看得到，到後來19世紀末在市中心發展出來的新藝術建築及木造建築，都成為里加獨一無二的價值。」

到達酒店後，酒店較似古式古香酒店般昏暗，雖然係幾靚，但感覺上較古舊，最重要既係連一支水都無供應，亦無水煲比你煲水，即係你一係比錢飲mini bar既礦泉水，一係係出面買水！不過我地都只係係酒店住一晚！

放低行李後，我地就出發往黑人頭之屋了！

里加最具紀念性的建築物就係這棟位於市政廳對面的黑人頭之屋。黑人頭之屋建於1344年，當時和市政廳一起被稱為「新建築」。

「黑人頭兄弟會」是14世紀時，由一班年輕，單身的德國商人所組成的工會組織，主要遍佈於愛沙尼亞和拉脫維亞兩個國家，性質較似招待所，提供住宿及舉辦團會等活動。

黑人頭之屋實在太漂亮了，我地忘記左未食早餐、午餐既飢餓感，提起相機不停拍照！再拎起我地既自拍神棍又瘋狂影左一陣子！突然有個來自重慶既男人走過黎想幫我地影相，仲比張咭片我地叫我地send e mail比佢，佢就會比返d相我地 ^_^

矗立在廣場中央的是羅蘭雕像。羅蘭是查里曼大帝的勇將之一，在德國許多的城鎮經常出現他的雕像，象徵著自由與正義。
影左兩個小時後，我地決定先去食野！黎到市政廳廣場附近的一間餐廳，叫左一客雞胸、薯條及一支sparkling wine，我地開始掌握到自己食野既份量，避免眼闊肚窄浪費食物。今餐不得不提既係呢支Riga 既sparkling wine，甜甜地好易入口好好飲，不勝酒力既我，飲完個人已經wing wing地！

食完tea後，我地準備行去亞柏特街民宅及伊莉莎白街民宅去欣賞新建築群，但因為飲到wing wing 地，經過聖彼得大教堂時並無為意，亦無入去參觀，只係係門前被V小姐影左張瘋狂的照片。

走進自由廣場，看到自由紀念碑，自由女神手捧著三顆星星分別代表拉脫維亞三個歷史區域--Kurzeme、Vidzeme及Latgale，上面刻著「For the fatherland and freedom」，可見拉脫維亞人對自己國家及身份的認同。

走入亞柏特街民宅及伊莉莎白街民宅，會見到好多屬於國家浪漫主義建築群，充滿著天馬行空的裝飾性新藝術風格。

晚上我地前往酒店就近的餐廳吃了點snacks就回酒店了。

待在里加只有半天的時間，確實太少了，未來得及仔細探索這個城市就要離去了！

下雨天, 塔林自由影 Day 5

日期：2015年7月23日
行程：塔林下城區
住宿：Radisson Blu Sky Hotel, Tallinn

今朝好早我就醒左，睇下Facebook 時發現被Juno 三步曲大篇幅洗版，噤就開YouTube 聽下係咩歌人氣噤勁啦，之後叫醒V小姐一齊聽。我地兩個因為呢首歌開始回憶屬於我地年代既歌曲⋯⋯

起身見個天仲放晴，心入面希望個天氣預測係錯架啦！我地仲想好好享受下中世紀氣氛下既童話世界呀！行入古城區，突然V小姐話想食pancakes, 原來佢見到有人食緊，噤我地就隨意走入個間餐廳，點左strawberry pancakes 同pizza 黎食！新鮮既strawberry 果jam 配pancakes真係一流，平時我都唔鐘意食甜野，特別係果jam, 但佢又整得好fresh! Good Try!

就係食呢一餐brunch, 我地由11點食到下晝4點！因為就係我地差唔多食完個時，竟然開始落雨！係古城區因為無瓦遮頭，就算出去行亦睇唔到d 咩，最後我地索性留係餐廳，悠閒噤渡過呢個下午！反而係呢4個鐘內，感到好悠閒、舒服！我地係到玩估歌仔，玩盡年代金曲！再黎睇YouTube，睇下而家Youtuber 拍既片，笑笑鬧鬧又過左一個下午！

4點幾見d雨開始停，我地步出餐廳往下城區進發！我地去左塔林最古老的巷――聖凱薩琳通道(Katariina Kaik)，整條通道佈滿了鵝卵石，上方還有如天橋般的拱廊屋簷，是充滿15到17世紀風情的小巷，好有藝術feel! V小姐突然叫停我，話覺得好靚要影下相，結果係呢條路上影左好多相，其他遊客都比我地影相既狂熱吸引左，加入影相，有d仲扮我地擺post tim!

離開聖凱薩琳通道，我地繼續往下城區隨意行走，到達每一處街景漂亮既地方，就停低影相，行下行下就回到維魯街既入口處，諗起琴日進入古城時因為天氣好陰暗無咩影相，又隨意影多幾張啦！

突然落起大雨，我地又沿路走入下城區，想搵返之前隨意行走時經過既一間餐廳，點知搵極都搵唔到，準備放棄之際，又比我搵到，好開心可以入去試下Tallinn 傳統既菜！

呢間餐廳名為Munga Kelder，係位於Vene 大街內一個小巷內，餐廳位於地地下室，佈置得像中世紀地窖一般，燈光也很昏暗很難拍照！

晚餐過後，我地就返酒店執野，準備明早離開呢個中世紀古城，向里加進發！

童話古城塔林 Day 4

日期：2015年7月22日
行程：塔林古城
住宿：Radisson Blu Sky Hotel, Tallinn
交通：Tallink overnight boat

今朝大約7點半時係睡醒之間聽到船上廣播，應該有人上船，因為船7點半開往塔林，9點半就到！再訓一陣，8點我就起左身準備，執埋d野，見到窗外落住毛毛細雨，心入面希望雨快d停，因為無左陽光，就影唔到塔林最美一面！

塔林是歐洲保存得最完整既中世紀城市，蜿蜒錯綜的石子街道，大約從11世紀到15世紀慢慢成形，到今天幾乎完全保留下來！1219年時，丹麥軍隊占領塔林長達130年，因此塔林名稱的由來，專家認為是由愛沙尼亞文 Taani Linnus兩字的縮寫而來，意指為丹麥的堡壘。

後來塔林又分別被瑞典和蘇俄统治相當久的時間，但即使長期被他國佔領，塔林的中世紀建築遺跡，百年的教堂，城牆，古屋都完善地保留下來，故此1997年，塔林舊城被列為世界文化遺產，塔林可說是一座活生生的城市博物館！走入塔林舊城區，如同真正進入中世紀、童話故事世界般興奮！

9:30am準時到達塔林，因為係歐盟區內，不需過關手續，好快就可離開碼頭，搭的士去酒店放低行李先！由碼頭到酒店約6歐（5分鐘車程）！

呢個時候已經無落雨架喇，但係個天仲係烏雲密佈！行出酒店，我地跟GPS開始走入古城區，係行去古城區前竟然見到H&M, 我地好似見到救兵噤，因為實在太凍喇，我地已經凍左三日，決定要買返件外套！

步入古城區時因為天氣不似預期，影唔到靚相，我地唯有先去搵野食！就近維魯街入口處有一間餐廳，我地決定係到食返個早餐先。

店員介紹我地食The Pearl of Baltic, 係用芝士焗三文魚，最特別係佢底下有菠蘿！我又因為好想食薯條，就order左一份！真係好好味！酒呢就試左之前網上見人推介既A le Coq!

食完豐富既一餐，我地開始前往市政廳廣場，天空亦開始放晴！係行入去市政廳中心個條路上，有個小販攤檔賣炒甜杏仁，d人仲著住中世紀既衣服，我地當然走過去睇下，聞到好香玉桂味，佢地仲比我地試食，我地試完即刻買左包黎食！真係好好味！後尾係d 紀念品鋪買到一切包密封既杏仁帶回香港，但係就貴好多，要成8歐，我地係小販攤買員需2.5歐！

歐洲的精華地段，幾乎都是在該地市政廳周圍，當然塔林也不例外！黎到市政廳中心，見到有好多攤檔係到擺賣，到處都係賣緊d傳統既衣服同琥珀！我地知道波羅的海三國係專出琥珀，今次都買左一兩件帶返香港！係市政廳中心，我地興奮得拎住自拍神棍不停影相，藍天令呢個古城更似童話世界般漂亮！

塔林舊城大致分為兩大部份：稱為圖皮姆(Toompea)的上城區坐落於一塊石灰岩高地上，屬於統治階層和貴族的活動領域；下城區位於圖皮姆和塔林港之間，居住於城裡的商人和中層階級統一由市議會管理。趁著天氣還好，我地想一睹塔林全貌，決定先前往上城區！

我地先前往滿有俄羅斯東正教特色的亞歷山大涅夫斯基大教堂(Alexander Nevsky Cathedral)，大教堂是在19世紀末時俄國沙皇亞歷山大三世和尼古拉二世時所建，所有建造費均來自俄國，成為波羅的海地區受俄化風潮留下的證明。可惜我地到達大教堂時，因大教堂正在進行維修工程，四面都搭棚，未能影到一張滿意的相片。結果退而求其次，改為拍攝樹蔭後的教堂！

再向前行就是口圖觀景台(Kohtu Vaateplatvormid)，位於圖皮姆山坡的東側，是擁抱塔林最佳地點！

再往山坡北面走多一點，就會到達帕特苦觀景台(Patkuli Vaateplatvormid)，從另一角度再次擁抱塔林！

係觀景台上巧遇兩位內地人，佢地想我地幫佢影張相，因為佢同伴影相技巧太爛⋯笑死我地！影左差唔多兩個鐘，我地返返去市政廳中心，準備食晚餐！今次我地又係食馴鹿料理，本身我地想試熊肉，但d staff話呢個時候未有得食住！

呢個鹿肉食落有d似羊肉噤，但鹿肉騷d同「鞋」d! 一碟馴鹿料理係得肉同薯仔，承惠36歐，d肉太多，我地兩個根本食唔晒！最後打包返酒店！

食完晚餐，我地就返酒店休息啦！滿足的一天！

細味傳統俄羅斯菜 Day 3

日期: 2015年7月21日
行程: 聖彼得堡 --> 芬蘭 --> 塔林
住宿: Tallink Overnight Boat
交通: 火車 + 夜船

今日諗住再入冬宮既紀念品售賣處，所以行程好鬆動，訓到好滿足10點幾就起身梳洗! 11點幾就去check out同放低行李! 之後慢步行去冬宮，今日既天氣真係好好，無再落雨喇! 

但去到冬宮發現好多人排緊隊入場，仲有一車又一車既旅行團，當我地見到噤多亞洲人既面孔時，都有諗下其實點樣分香港、內地、日本同韓國既婦女，最後行左一圈，得出左個結論如下:

香港媽媽: 著羽絨 + T shirt長褲+背囊 + 水樽 + 無化妝
內地媽媽: 花裙 + 斜揹袋(咩牌子都係) + 無化妝
日本媽媽: 乾濕褸 + 側揹袋 + 化妝 + 身型細小
韓國媽媽: 與日本媽媽差唔多，但身型較健壯

經過呢個分析，好快可以分得出一團又一團既旅客係屬於咩國家! 哈哈! 

去到冬宮門口發現d人真係多到要排晒出門口噤濟，我地立即打退堂鼓，因為本身上年已經入去參觀過，所以我地決定去搵野食同埋再深度探索呢個城市。

我地行返去涅瓦大街，見到有間餐廳好靚就入左去，剛好我地係佢地今日笫一個客，間餐廳名稱為<< THE Katyusha Restaurant>>，我地請佢地為我地介紹傳統菜色:

Gzhel -- Cocktails

Russian Salad with boiled veal

Siberian pelmeni with different types of meat

Cottage Cheese pancakes with sour cream

Cutlet

beef stroganoff

原全無諗過呢餐係噤美味架! 本身我同V小姐兩個都係唔多鍾意食沙律既人，但waitress 同我地介紹佢地呢款traditional salad 係過時過節都會食，我地就諗住試下啦，一試就愛上了，佢入面係有d薯仔、青瓜、青豆等等，配合埋個沙律醬係岩岩好，好美味架! 另外最值得一讚係個cutlets，有d似炸肉餅噤，外層係痴滿麵包糠，炸到好脆而入面d肉汁係多到流晒出黎，係好食到停唔到口! 就連琴晚已經試過既stroganoff 竟然整得比Teplo 更好食! 真係每一道食品都好好食，令我地對呢個城市又加左好多分 ^_^

食完我地就根據酒店職只比既資料，搭地鐵去奠斯科火車站附近既一個商場，因為我地想搵下d 俄羅斯既護膚品試下。

係聖彼得堡搭地鐵真係完全唔使擔心有會跳軌自殺，因為你係望唔到條路軌既，好安全呀真係! 但就無莫斯科地鐵站噤靚!

去到莫斯科火車站附近搵黎搵去都搵唔到個間shopping mall，我地就決定係條大街到慢慢行，見到有鋪就行入去睇下係d咩啦，仲有就係行便利店，我地想搵返上年係Siberia食過個隻雪糕，不過最後都搵唔到，可能真係係Siberia先有啦!

行下經過Natura Siberica呢間類似body shop既鋪，我地就入去睇，同買左以下產品:

買呢兩件只需要HKD$143 咋，個時唔知好唔好用，只買左呢個件，返去試左發覺好好用，後悔買得少。之後竟然比我發現原來香港係有得賣，不過可能會貴D。

差不多六點半我地返返酒店，想叫酒店幫我地CALL車去芬蘭火車站搭7:25pm 火車返芬蘭，點知酒店話call左車，但佢唔敢擔保我地一定趕得到，因為6點幾好塞車，我聽完即刻係到諗即係book 夜車直去塔林。

係好緊張既情況下，最後一秒，我地去到火車站，點知原來仲要過關，我以為同黎個時一樣，係火車上搞出關手續，點知仲有出關，好彩俄羅斯關只實在好幫手，幫我地check完passport同行李，仲幫我地拎行李上車，等埋我地先開車，上到車鬆左一口氣。

11:10pm 到左Helsinki Central Railways station，我地就立即上的士去west habour，去到先11:30pm左右，成個terminal已經係無晒人，我地今晚係係Tallink Overnight Boat到訓一晚，聽朝起身9:30am就會到塔林架喇! 去到check in, 個staff 話等埋我地同開門比我地上船後佢就要收工，不過架船遲左到，要1點先黎到，我地係空無一人既terminal等到1點，又凍又餓...

終於捱到1點鍾上到船，成隻船好似得我地兩個，無人上船，不過我地唔理得噤多啦，搵到間房就沖涼訓覺啦!

再遊俄羅斯聖彼得堡 Day 2

日期：2015年7月20日
行程：Helsinki --> St Petersburg
住宿：Domina Prestige St Petersburg
交通 : 火車

今朝好早起身執野，準備搭6：10am 火車去聖彼得堡，由於火車站就係係酒店旁，所以先選擇搭噤早既火車！點知去到5點鐘V小姐都係唔肯起身，之後再遲多5分鐘我迫佢起身後，佢先不情願噤起身洗頭換衫，到5：40am左右，我忍唔住叫佢快d，因為真係會miss左班火車，佢又再唔情願噤同我講其實班車6點10先開，做咩要噤急！我先知原來佢一直以為班車係6點50分，噤佢就係噤快d執野，我就去Check out先，一見到佢係電梯出黎我就衝去火車站，佢係後面叫住我先見到佢仲拎埋我地琴日買既Pizza，笑死我喇！

因為火車站近既關係，我地上到火車都仲有15分鐘先開，所以我地先慢慢擺好行李再搵位坐，但搵到岩既車卡搵唔到個位係邊，所以是但坐。整好後開始享用塊Pizza，如果唔係V小姐係噤情急既情況下都拎埋個Pizza，我地就無早餐食架喇！架火車其實都坐得幾舒服，又有水機，有wifi，有得差電！隔左一個小時左右，有芬蘭關員上黎同我地整過關手續，而且話我地坐位唔岩，先見到原來坐位邊係有No. 架！！見到關員check埋坐位，我先明白點解上火車時佢係唔check 票既！出左關後繼續訓下覺，整下相，再過半個鐘又有關員上黎，今次係俄羅斯關員，佢好想知我地去邊，個行程係點，最後仲抽左我個「喼」黎check!

坐多個半小時終於都到達聖彼得堡喇！再次重臨舊地，無第一次噤驚，好淡定噤跟人行出火車站，突然V小姐話，無盧布係身搭唔到的士，我地嘗試搵銀行，但搵唔到，結果有個應該都係外地既俄羅斯人幫我地搵（可能黎自莫斯科？），雖然唔係好明佢講咩，但佢比左個方向我地，我都仲認得俄文既銀行係點寫，所以好快就搵到銀行再搭的士去Domina 酒店！最好笑係去到酒店比錢時，比5000盧布比司機，開初佢唔收，但因為無現金係身，最後佢講左句「佢見我地係銀行出黎，應該係真錢黎既」，原來佢地都會好似我地收$1000蚊噤怕收到偽鈔！

去到Domina 酒店放低行李，我地就好熟路噤行去搵野食喇！有時不得不佩服自己既記憶力，一出酒店門口已經知係邊個方向同點行！今次我地去個間cafe 我地上年已經去過架喇！入到去係熟悉既環境，不過一個人都無，入去個時我以為未開鋪Tim!

店內裝潢

今次試左dumpling 同codfish! 本來我想食個個dumpling 應該係上年食過個款，點知今次個款好似香港既肉絞噤，唔多特別！反而Codfish 就好好味！

食完我地就開始今次既目標喇！今次我地黎聖彼得堡就係想買俄羅斯特色既紀念品，好似手鏈、戒指、耳環、圍裙等等！因為上年買左返去時大獲好評！

我地行左去基督教復活大教堂個邊，發現左個邊有小販售賣自拍神棍覺得好驚訝！因為上年我地拎神棍影相，當地人個個覺得好出奇，甚至會主動上前同我地影Tim! 估唔到一年後，神棍係呢到就興起了！

買完之後，我地又行左返去冬宮影相，其實冬宮我地上年已經影相影到爛，烈日當空下影左兩三個鐘，今次回到聖彼得堡，影相意慾大減，但V小姐認為冬宮實在太靚，所以要再返去影相！我都唔執輸，咩都影下啦！但影唔夠一陣，竟然開始落雨，我地準備搵餐廳食完晚餐就返酒店好了，點知d雨愈落愈大，我地唯有係馬路旁一幢建築物下避雨，等左至少半個鐘，我地先行返去酒店附近有一間叫做Teplo 既餐廳！

呢間餐廳係V小姐係trip advisor到睇到既，上年已經想去試，不過太近酒店所以出左去就唔會特登行返去試囉！今次好了，終於可以嘗試！入到餐廳原來已經好多人，係要訂台既，無訂台既我地只分配到對牆既座位，不過都唔緊要啦！

今次我地請職員介紹當傳統既俄羅斯菜比我地試，一試有驚喜！

Warm Alcoholic Drink --- 呢杯叫咩名我就唔記得，但睇落去有d似熱檸茶，不過熱既酒精飲品我第一次試咋，幾特別！

Codfish Again

Beef Stangnoff

Potato Pancake

食完好滿足就回酒店休息了，順帶一提，Domina 呢間酒店我地第二次黎住，因為上年住得好舒服！唔單止硬件上好舒服，佢地既服務更加一流，我地check in時都聽到其他旅客讚佢地服務超好，係一間worth 五星既酒店!