哥斯達黎加 Costa Rica Day 3

2013年7月21日

本身今日係要去阿雷娜火山口到近距離睇火山架，但因為我同男朋友兩個人都訓到唔知醒 T_T 訓到11點幾，表哥佢地又唔好意思叫醒我地，結果計劃泡湯了啦!! 

11點幾我地兩個先起身，食埋早餐(都唔知係早餐定晚餐!)就改變行程啦!! 轉而去卡拉拉國家公園(Carara National Park)，呢個公園係一個熱帶雨林黎，有好多受保護既動物、鳥類同昆蟲。其實我都幾怕昆蟲，所以入去行公園時已經覺得好多蚊好難頂，點知要去入熱帶雨林個時，竟然落大雨，係好大雨!! 講起落雨，我地黎幾多日，就落足幾多日雨，聽表哥講，哥國係成日都落雨，就算朝早係天晴，轉個頭下午就會落雨。因為落大雨既關係，所以公園唔比我地入去雨林區到參觀，話會好危險喎，結果我地就只可以走啦!!

Carara National Park

之後表哥就車我地去左一個唔知係咩既地方，因為佢要買雞同鵝，表哥家中既後花園有一個小農場，所以佢想養多幾隻雞同鵝!! 

表哥同當地人用Spanish講價! 我都唔知佢地係到講緊咩，但最後好似講到好滿意噤買左兩隻雞同鵝，放左係車尾，見到隻鵝個頭噤長，我好驚佢會啄到我><

其實搞完一輪，再坐車返去San Jose表哥家已經夜晚8點幾啦，今日有大部份既時間都係坐車到，累死我了。

哥斯達黎加 Costa Rica Day 2

2013年7月20日

行程: Arenal Volcano Hot Spring (火山區浸溫泉) 
住宿: 興隆飯店

昨晚我地就係表哥既新屋到住，本來我地應該係4月去Costa Rica既，但因為表哥新屋未裝修好，所以就延遲到7月，我地黎到個時，間屋叫做岩岩裝修好，佢地一家人都仲未搬黎住，只有基本既設備! 但新屋好大，有好多間房，又有個好大既後花園，岩晒d小朋友，有個露天既廚房同飯堂，仲有個小小既農場tim ar!!!

從家中望返出去

從露台望向後花園

我地起身時已經係11點幾了，兩個小表弟係噤係房門外喧鬧，想噪醒我地，真係無佢地辦法! 起身之後，表哥煮左面比我地食，之後我地就出發去佢地開既炸雞鋪到睇下! 聽佢地講哥斯達黎加人好鍾意食炸雞，所以佢地都開返一間噤話! 等佢地執好晒d野，我地就出發啦!! 

Costa Rica位處火山帶，哥國有多處火山，其中最出名既就係阿雷娜火山(Arenal Volcano)，火山附近有好多溫泉酒店!不過今次去Costa Rica 我無做資料搜集，所以去到好多野都唔知，全由表哥安排，都係事後返HK上網check返先知，有少少遺憾!

阿雷娜火山(Arenal Volcano)

表哥先請左個外國人幫我地開車，因為由一個地方去另一地方分分鍾係講緊2-4個鍾既車程呀，表哥話去玩仲要專注開車會好累!我地今次去既地方就係阿雷娜火山(Arenal Volcano)區，我地開車去到一個叫興隆飯店既旅館，原來呢間旅館係表哥朋友開既，聽佢地講，原來好多年前已經有好多中國人移民左黎哥國，主要都係開餐廳，因為外國人偏好中菜，所以基本上以前去哥國既中國人而家普遍都好有錢架喇，而且中國人又出名捱得，所以捱到今時今日生活都比香港人好好多架喇!

同表哥朋友傾計都傾左好耐，食埋晚飯之後我地就上房準備執好要帶去浸溫泉既物品就出發啦!今次我地去浸溫泉既地方係 Baldi Hot Springs Hotel & Spa! 

因為去浸溫泉個時無拎相機，呢d溫泉飯店既相都係事後係網上搵返既，其實入面都幾靚同好大架!!

浸完就開車返去興隆飯店到休息lu......

哥斯達黎加 Costa Rica Day 1

2013年選擇去既地方係位於中美洲既哥斯達黎加Costa Rica，哥斯大黎加係世界上笫一個不設軍隊既國家，而且係一個非常民主既國家tim，通常大家只會係體育新聞聽到呢個國家名，呢個國家既足球隊好似好勁。

男朋友既表哥係長居於哥斯達黎加，係好早期係內地移民過去開中式餐廳，由於表哥經常都叫男朋友過去哥斯達黎加到接手佢既生意，所以今次我地就過去睇一睇環境及順道旅遊一下。

香港去哥斯達黎加係無直航機，多數都係經美國或姐加拿大轉機既，我地去左好多間旅行社問機票，無一間可以比到準確既資料我地，可能真係無咩香港人去，所以旅行社d人唔識得搵。其中有一次我地去中旅社到問，中旅社個職員幫我地搵機場，因為哥斯達黎加既機場係San Jose機場，而美國加洲亦都有一個San Jose機場，因為同名，所以旅行社職員次次都只係搵到美國機場個資料，但當我地一睇到duration of flight噤短(約10hrs左右)就知佢一定係搵錯機場啦，但奈何話極比佢地知，佢地都搵唔到。直到我地再試下去專業旅運到問，佢就真係幫我地搵到張平 D 機票，加上服務態度又好，所以就直接落訂了。

買左機票又要整美國簽證，因為要係紐約轉機，所以要整美國簽證，表哥一再提示我地唔好整過境簽證，要整旅遊簽證，我都唔知點解，但照做就係了。而家係網上交申請表再掛期整簽證其實都好快，而且一批就批左10年既旅遊簽證比我地，準備好晒d 機票同證件，就等時間既來臨。

就係2013年6月18日朝早10點我地就搭上聯合航空前往哥斯達黎加，去到美國已經係笫日19號既朝早，因為坐長途機既關係，真係訓又訓唔到，坐到個人好累，只係不停噤睇下電影消磨時間!男朋友就慘，本身個人都已經唔坐得，睇戲坐係到兩個鍾佢都已經唔係好得，而家仲要坐10幾舍鍾，坐到佢條腰都酸埋。去到紐約，要出入境先，係入境關卡，好多中國人係到排隊，係好多!! 入境後又要去拎返d行李，再過海關，再出多次境，真係搞好耐，好彩買機票個時預左充足既時間! 要下午4點幾左右就上機飛去哥斯達黎加啦!! 成班機係沒有一個華人!!

夜晚7點終於到達San Jose機場，表哥係機場外等我地，再車我地去中餐館食飯先。男朋友家族入面都有好多親戚早已移民左過去哥斯達黎加，所以呢餐飯好似洗塵飯局噤，好多親戚都黎晒，但係除左表哥之外我一個都唔識! 食完餐飯，我地就去左表哥既新屋到休息lu....笫一日就係係飛機中渡過。

維也納美麗後花園 Vienna Day 3

2009年5月27日

今日約左台灣女生Sherry 9點鍾一齊去美泉宮，所以一早起左身食埋早餐，差唔多時間就全hostel既大廳到等佢，再一齊出發去美泉宮。

一路上，我地傾左好多香港同台灣既文化差異，比如話: 「香港人一直認為台灣女生講說比較嬌嗲」哈，Sherry都有幾大回響，直認台灣確實有唔少女生真係誇張式既嬌嗲口音，有時佢自己都受唔到，但唔係所有台灣女生都係噤，佢自己就唔係。又傾到「台灣人既旅遊視野較廣」，唔知大家有無留意到，其實台灣人比香港人更早出外旅遊，去探索世界不同既角落，而香港人則較為井底之蛙，外出既地方多為已開發既旅遊景點。一 D 鮮為人知既地方，香港人係極少會去既! 好似2009年我去瑞典 exchange時，身邊既人大多分唔清瑞典同瑞士，但係而家2015年，你會睇到書局出多左北歐既旅遊書籍! 當年既我，就係屬於井底之蛙，只係會去下d 已開發既旅遊景點架咋，去意大利又驚遇上黑手黨，相對個時，台灣人已經不斷噤出國旅遊，對世界另有一番體會呢! 

傾傾下就到左美泉宮，美泉宮既設計同豪華程度都係仿照法國既凡爾賽宮，屬於巴洛克式既建築，但當然不及凡爾賽宮既金碧輝煌，由於宮內裡頭唔比影相，所以一張相都無影到，而家真係唔記得左入面係點既樣喇......

呢張相係係美泉宮後花園既山上影返落黎，可以見到美泉宮及整個維也納既景色! 

我好少見到d 噤大朵噤靚既玫瑰

呢條玫瑰隧道，入左去你唔會想出返黎

上圖既個迷宮望上去好易過，我係上邊望住d人玩左一陣，心諗都唔係好難姐，我就同Sherry落去玩下，點知原來係入面都真係唔係話易架，我地兜兜團團左一輪，見到唔少面孔係前一個轉角位遇過，下一個轉角位又遇返，哈，好彩後尾有人指點一二，我地順利離開左個迷宮。

呢舊石頭，相傳掂住佢就會有好運，但呢個傳聞點黎我就唔知喇(或唔記得左...^^") 我當然唔執輸，去沾下d 好運啦!!

係美泉宮遊覽完之後，我地就趕去下一個地方 --- 得意屋! 用「趕」呢個字係因為Sherry 下午4點就要離開Vienna，繼續佢去捷克布拉格既行程啦，所以我地都把握時間。

呢楝住宅係1983 - 1986年維也納政府委託奧地利著名藝術家

Hundertwasser、建築師 Josef Krawina及Peter Pelikan 設計建築而成既住宅，係維也納著名既景點之一。


參觀過後，Sherry要走了，我地彼此交換左facebook後，佢就繼續行程，而我係得意屋到遊覽多一陣，之後就要開始搵野食了。我揀左一間露天既餐廳，天氣噤好，係應該要享受一下陽光。

試呢個奧地利出名既炸豬扒，塊豬扒大到好似我兩塊面噤大，食落除左覺得鬆軟之外，其實都係同香港食既分別不大。但可以享受下呢到既環境同美食，都係一個唔錯既選擇，承惠 8.8歐。

之後又係街邊遊走，同埋買手信後就返hostel休息喇... 三日既個人遊就完結了。