俄羅斯聖彼得堡Day 3 (上)

2014年7月23日

我同V小姐選擇搭夜間火車去聖彼得堡，8個小時既夜間火車不得不提既係，我係網上預定火車票個時，因為唔係太識睇俄文，胡裡胡塗竟然訂左豪華二人包箱，雖然比錢個時覺得有D奇怪點解噤貴，但係都係照樣比左錢...(承惠約HKD$1200一人)，仲貴過住酒店......

呢個豪華包箱真係幾正架，首先台面上已經放好晒笫二朝既早餐同飲品，另外，亦一早準備左牙刷、拖鞋等等!!而最重要既係，入面竟然有MINI SIZE既洗面盤同水龍頭，同埋衣櫃! 真係好似一個MINI 流動酒店噤!!以前我係歐洲都搭過火車，但真係未試過原來豪華包箱係可以噤舒服的!!

我地自HIGH完一輪就準備訓覺了，但搭夜間火車總係有種不安全感，因為以前係意大利搭夜間火車試過有唔太好既經歷，所以我確定鎖好晒D門，同埋將貴重野跟身後就訓覺了。

唔經唔覺 8 點就到達聖彼得堡，先去左Hotel 擺低行李，今次住既酒店係Domina Prestige St. Petersburg，呢間hotel 係我係hotels.com時見到，做緊優惠，見地點又方便，價錢又唔貴就book左呢間，呢間酒店比我地既experience真係好好，服務人員又nice，間房又超級靚同大，我同V小姐都好滿意~!!

俄羅斯莫斯科 Day2

2014年7月22日

我同V小姐都係極貪睡之人，可能因為工作關係已經習慣左遲睡遲起，所以即使前一晚定左要早起，去到最後我地都係決定要訓過夠先起身！！！（噤先有精力去玩ma... :p）

10：00起身後，先食返琴晚係超市買既Kebab做早餐，（kebab 係我旅行時最愛食既食物之一，早年係德國旅行時一試就愛上，雖然香港都有得食，但始終旅行食既味道係唔同D ) ，食完早餐後，我地先去酒店附近既紀念品市場行逛。

紀念品市場

行得呢個紀念品市場，當然我地兩個都想買D俄羅斯娃娃返去啦，但入去呢個市場門口竟然要收入場費$10盧布!!! 

行左兩個圈，我地分別買左幾個娃娃、洋蔥頭模型等等，因為身上既盧布已所剩無幾，就坐底食個lunch! 入邊有個好似燒串燒既攤販，燒三文魚、羊、牛，我地就坐底開餐啦!

食完我地就出發再去紅場影相!!! 紅場有一種魅力，總係吸引人想再去，去享受紅場獨有的活力、自由感，又再影左一輪相後，就去閒逛阿伯特街享受莫斯科的下午。

中途見到有人拉小提琴，拉得好勁就駐足觀賞，拉完之後，V小姐提議上前同佢地影相，係佢地準備拉笫二首歌既中間，我地就走左過去，拎出我地既自拍神棍同佢地影相，在場既人個個都好驚訝，驚訝既係佢見到我地支自拍神棍 (哈哈!!)

係呢條阿伯特街，我地只係漫無目的行逛享受，係街邊既BAR到飲酒傾計，甚至係到玩美拍，玩到時間差唔多，就返酒店拎行李去火車站，準備夜車去聖彼得堡!! 

係莫斯科，我地唯一既景點係紅場，無特別去其他旅客都會去既地方，因為我地只係stay 兩日，同埋係旅程中，享受一個漫無目的既旅程，比起趕景點更加令人回味無窮!! (以前旅行，我都會趕景點，周圍睇，但後尾發現，除左睇到時"嘩"左一聲之外，就無留下特別既記憶....)

俄羅斯莫斯科 Day 1

2014年7月21日

去到莫斯科DME機場，入境好快，過程中無任何阻礙，關卡人員雖然無咩表情但係都好NICE既。

入左境就梗係搵機場快線出市中心啦，我同V小姐坐機場快線出去再轉搭地鐵去酒店。同想像中有少少出入既係，我一直以為莫斯科人好冷淡，聽朋友講過話好RUDE，但呢次既旅程我又唔係噤諗喎，事關我地兩個去到邊，都總會有當地既人幫我地拎行李，特別係MOSCOW METRO，又多梯級，我地兩個一人拎住一箱行李都咪話唔辛苦。

今次我地住既酒店係Hotel Izmailovo Delta，位置距離紅場不出5個站，係紀念品市場旁邊。去到酒店放底野之後就去酒店餐廳食個TEA，飲杯啤酒，再出發去紅場~~

由於V小姐熱愛自拍，我地係呢個紅場玩左一輪都係幾個鍾既事，之後就去搵下邊到有得睇芭蕾舞表現啦，黎到莫斯科有兩樣野係一定要睇既，就係芭蕾舞同馬氣團，但因為時間既關係(明晚就要坐夜車去聖彼得堡)馬戲團就睇唔到lu....

俄羅斯九天之旅 (出發)

2014年7月21日 

經過一個月既準備，我同V小姐終於要開始我地既俄羅斯九天之旅啦~!!! 最初選定去俄羅斯係因為V小姐話佢從小對俄羅斯呢個地方有一種憧憬，想去睇洋蔥頭同埋貝加爾湖，而佢又學過俄文，所以理所當然就去左俄羅斯啦~~~

出發當天，下午收到一個好消息，就係國泰UPGARDE左我地去商務倉，收到呢個突如其來既好消息，我地都帶住興奮既心情出發......

當晚因飛機延遲關係，我地係機場等左3個小時，終於係凌晨3點上到機，好彩係商務機位，一上機我同V小姐已經訓左覺，起身時已差不到莫斯科了......