行程： Guanacaste 沙灘酒店 Hotel RIU Guanacaste
今日我地要去既地方就係位於Sardinal 既沙灘酒店Hotel Guanacaste! 係二表姐話要請我同男朋友去玩幾日，不過因為後日要返香港啦，所以今次只係玩左兩日一夜！
約左下午1點係某個高速公路既入口都等埋二表姐佢地，齊人之後就出發啦！又要坐成個半鍾既車程啦！去到酒店門口落車個一刻，因為個太陽太勁，突然間個人好暈好辛苦，差d暈低，因為溫差太勁! 加上腸胃炎又未好返，突然又會好肚痛，即時面都白晒。
\
呢間就係哥斯達黎加其中一個好出名既沙灘酒店，除左位處沙灘，有游泳池、夜總會、水療、賭場等等，都好多野玩! 本身都想去玩浮潛，但因為我仲間歇性肚痛，一痛起上黎行都行唔到，所以無玩到啦!!
噤我地先上房放低晒d行李，再落去食個tea先，再去游水。
個泳池好大，分好多個區，有區係位於酒巴既位置，等你可以泳池到飲野，有區係比你訓係到晒太陽、有區就真係比你游水同玩水既，唔識游水既我當然只係係飲野加晒太陽既區域到玩啦，同男朋友玩左兩個鍾水，開始有d累就返上房沖涼，準備落去食dinner喇。酒店有中式及西式餐廳，我地去左食中式餐廳，再一次證明，外國既中式餐廳d野食永遠都不是正宗的，麻麻地啦，但西式自助餐野食多數較油膩，所以都係食左少少!
食完我又開始唔舒服，上左房休息訓覺了，男朋友就同表哥去左酒店既酒吧到飲酒吹水。
笫二日起身，好左d，就起身整理好準備落去食左個豐富既早餐，再去玩左一陣，就準備走了。
走既時候因為知道Liberia個條路有示威活動而封左路，所以表哥決定改路去Puntarenas 到食lunch，再返去San Jose，返到去都已經晚上了，又準備要執行李返香港了。
係Costa Rica 既日子真係好短，其實有好多地方都仲未有時間去，因為假期太少既關係，無辦法再放耐d，如果唔係可以北上墨西哥，南下南美洲各國玩落去，畢竟去美洲既機票唔平。
係Costa Rica既期間，你會感受到民主，人民既權力好大，對政府有不滿可以即時示威迫使政府不得不正視民意；亦了解到當地社會福利及醫療福利齊全，人民不至處於落泊境地；良好既教育制度，大力發展教育。
反觀香港，所謂國際大城市，社會福利只偏重新移民，基本上納稅人如我係享受唔到任何既社會福利，社會福利只係留比d唔願付出，但想享受港人福利既雙非兒童及其內地家人；去公立醫院睇個醫生要排幾個鍾，有重要疾病要排幾年；想要有個地方住，樓價就不斷攀升，中產都未未買得起；想要有民主卻不斷被政府用盡一切辦法阻止；讀到大專學歷出黎工作，薪金亦不如中五畢業既銷售員，完完全全係一個畸形既社會。
呢次旅程令我對拉丁美洲提起興趣，亦開始搜集南美既資料，下一次再到拉丁美洲，希望能夠逗留至少三個月，去走遍整個南美，了解地球彼岸的另一端。
