初到馬累 DAY1

日期：2016年6月19日
行程：香港－－＞馬列
住宿：LAGUNA BOUTIQUE
交通：國泰航空＆酒店專車接送

香港去馬爾代夫主要直航有香港航空及國泰航空，而要轉機或玩多一個點既話，多數人都會搭新加玻航空，由新加玻轉飛至馬列。由於今次我地諗住只係去馬爾代夫，所以緊係選擇直飛啦，直飛既話只需要6小時15分就可到達，作為環宇一家既MEMBER，我唔會放過儲MILES既機會，自然首選國泰。

但往往飛馬列既航班時間不太理想，多數下午機晚上到達馬列機場，加上水上飛機晚上唔飛，所以被迫要停留在馬列市一晚，到第2天才可搭船或水飛前往其他島嶼，對於假期較少既我真係不方便，但都無辦法，唯有請多幾天假期吧。

我地班機係17:30出發，係機場食個TEA之後就準備上機啦，上機時發現好多內地人都係搭同一班機飛，自從國內人去馬爾代夫免簽證後，真係多左好多大媽，所以選島時記得要考慮呢個因素。

準備出發

由於只係搭6小時左右，係機上睇左《追婚日記》同《紀念日》兩套電影後，時間都差唔多就飛到馬列。馬爾代夫係比香港快3個鐘，到達時係20:45。

過關時發現佢地既關卡真係好簡單，一出關卡已經係行李輸送帶。

等左好耐先到我地

拎完行李就出去ARRIVAL大堂，好快就搵到LAGUNA BOUTIQUE 既職員，原來今日有一PAIR內地夫婦同我地都係入住LAGUNA既。

職員車我地去到酒店CHECK－IN後，會同我地約埋聽日早餐及水飛時間，就幫我地拎行李上房啦，因為酒店無電梯﹐所以上到房老公都比左USD$2 小費比佢！我即刻問埋酒店有無提供FREE WI-FI，好彩有問咋，因為第2朝我聽到其他住客講，原來佢地以為酒店無WI-FI架！

上到房發現房間好簡陋，張床既被及浴巾感覺唔乾淨，廁所先係最大問題，廁所簡單到得一個洗面盤及企缸，風筒都無。我訂前有上網CHECK過呢間聲稱係4星級酒店，上官網睇過都OK，無諗過個環境同我預期有噤大落差，真係令今次旅程有少少美中不足。不過都只係住一晚，唔緊要啦，沖完涼上陣網就訓啦。

溫馨提示一下：由於酒店距離市中心較遠，搭車沿路都見唔到附近有任個便利店、小食店等等，加上去到酒店已經9點幾10點左右，所以最好帶定少少糧食過去啦，以免夜晚餓親。好彩今次我帶左少少野食去﹐所以都無特別再問小黑附近有無野食。